Градоначалникот на Општина Шуто Оризари Курто Дудуш го потпиша меморандумот за проектот на УСАИД за меѓуетничка интеграција на младите во образованието кој ќе се спроведува во Шуто Оризари. Проектот е имплементиран во соработка меѓу Агенцијата на САД за меѓународен развој (УСАИД) и Македонскиот центар за граѓанско образование.
Согласно потпишаниот меморандум, трите главни компоненти на проект се зајакнување на меѓуетничката кохезија, зајакнување на граѓанската култура и однесување на младите на ниво на училиште и заедница и стимул за училиштата – реновирање.
Проектот на УСАИД за меѓуетничка интеграција на младите во образованието (МИМО) ќе ја подобри меѓуетничката кохезија меѓу младите преку создавање на услови за позитивна интеракција и преку градење на демократски и граѓански вредности.
Воедно, Проектот ќе ги зајакне способностите на кадарот во училиштето, учениците и родителите за разгледување на прашања и справување со проблеми што се однесуваат на различностите и правичноста во нивните училишта и локални заедници.
Реновирањето на училиштата ќе се користи како стимул во рамки на проектот со цел создавање на подобра средина за учење и спроведување на проектни активности во насока на поддржување на младите за модерна економија и стабилна демократија кои се стратешки цели на УСАИД.
Општината ќе поднесе техничка документација за проектот за реновирање и ќе обезбеди учество во проектот за реновирање во работна рака, финансиски средства и/или опрема во вредност минимум 25% од вкупната вредност на реновирањето.
Подобрување на наставата по граѓанско образование во училиштата ќе се постигне преку истражување и анализа на наставната програма по предметот граѓанско образование за воведување на методи на работа и учење кои се во насока на нејзино подобрување.
Основното училиште Браќа Рамиз и Хамид ќе даде поддршка преку обезбедување на учество на наставници, ученици и родители во фокус групи, интервјуа и обуки за добивање на повратни информации потребни за истражувањето и подобрување на вештините и компетенциите на наставниците.