Гостување на градоначалникот Курто Дудуш во емисијата „Бијандипе“ на МТВ – ромската редакција.
Шуто Оризари денес – општина која се менува и расте
По повод одбележувањето на 30 години од основањето на Општина Шуто Оризари, градоначалникот Курто Дудуш гостуваше во емисијата „Бијандипе“ на МТВ – ромската редакција.
Говорејќи за изминатите три децении, Дудуш посебно се осврна на промените што се случуваат во Шуто Оризари и на начинот на кој општината денес изгледа во споредба со минатото.
„Најдобро промените се гледаат преку очите на оние кои подолго време не биле во Шуто Оризари. Кога ќе се вратат после неколку години, тие гледаат општина која многу се променила. Шуто Оризари повеќе не е она што некои го паметат од порано – денес станува сè поурбана и поорганизирана средина.“
Во изминатите години, Шуто Оризари постепено го менува својот лик. Од населба која долго време се соочуваше со сериозни инфраструктурни и урбанистички предизвици, денес прераснува во урбана средина со сериозен потенцијал за понатамошен развој.
Сепак, за тој развој да продолжи со уште поголема динамика, неопходно е современо и долгорочно урбанистичко планирање.
Во тој контекст, градоначалникот го истакна и значењето на новиот Генерален урбанистички план за Скопје. Иако постојниот ГУП е со плански период 2012–2022, новиот план сè уште не е донесен.
„Новиот ГУП за нас е од огромно значење. Тој може да донесе сосема нова перспектива за Шуто Оризари. Со правилно планирање можеме да отвориме простор за нови содржини, нови инвестиции, економски развој и подобри услови за живот на граѓаните.“
Особено значајно е планирањето на индустриската зона, која може да биде еден од двигателите на идниот економски развој на општината – со можност за отворање нови работни места, привлекување инвестиции и создавање услови младите да ја гледаат својата иднина во Шуто Оризари.
Дополнително, новиот ГУП треба да овозможи и просторно проширување и развој на Шуто Оризари, со што општината ќе добие можност плански да расте и да се развива како современа урбана целина.
„Пред 30 години започнавме со општина која имаше многу предизвици. Денес имаме Шуто Оризари кое изгледа поинаку. Но, не треба да бидеме задоволни само со тоа што е направено. Нашата цел е во следните години Шуто Оризари да биде уште поурбано, поразвиено и економски посилно. Новиот ГУП може да биде една од најважните алки за да го постигнеме тоа.“
Три децении Шуто Оризари се приказна за промена, истрајност и развој. Но, 30-годишниот јубилеј не е само поглед кон минатото – тој е и почеток на визијата за следните 30 години.
Шуто Оризари се менува. Шуто Оризари расте. И најдоброто допрва следува.