Шуто Оризари домаќин на европска средба на ромски политички лидери
Шуто Оризари беше домаќин на значајна меѓународна средба во рамките на иницијативата Sherutnipe
Средба посветена на размена на искуства, предизвици и практики од локалното и националното управување.
Шуто Оризари беше домаќин на значајна меѓународна средба во рамките на иницијативата Sherutnipe, која ги поврзува Ромите кои денес имаат политички мандат и одговорност во јавните институции.
Во посетата учествуваа ромски политички претставници од Црна Гора, Србија, Унгарија, Романија, Словачка, Молдавија и Бугарија. Средбата беше посветена на размена на искуства, предизвици и практики од локалното и националното управување.
За учесниците, Шуто Оризари претставува посебно место – општина во која Ромите не се само дел од политичкиот процес, туку директно учествуваат во управувањето и носењето одлуки.
Гостите имаа можност да ја посетат општината и да се запознаат со нејзиното функционирање, како и со дел од реализираните проекти во изминатите години, вклучително и плоштадот, детската градинка, основното и средното училиште и инфраструктурните проекти.
Признание за придонесот кон ромската заедница
Посебен момент во рамките на посетата беше доделувањето на Плакета „Почесен граѓанин на Општина Шуто Оризари“ на Петре Флорин Маноле, пратеник во Домот на пратениците на Романија и поранешен министер за труд, семејство, млади и социјална сигурност на Романија.
Плакетата му ја додели градоначалникот на Општина Шуто Оризари, Курто Дудуш, како израз на признание за неговиот придонес кон унапредувањето на положбата на Ромите, јакнењето на нивното политичко учество и заложбите за социјална инклузија.
Ова признание претставува и симбол на поврзувањето на ромските лидери од различни европски земји и на заедничката определба за посилно политичко учество и подобри услови за ромските заедници.
Размената на искуства покажа дека, и покрај разликите меѓу државите, ромските заедници низ Европа се соочуваат со многу слични предизвици – од инфраструктурата и домувањето, до пристапот до вода, електрична енергија, образование и јавни услуги.
Токму затоа Sherutnipe има особено значење: да ги поврзе ромските политички лидери, да го сподели стекнатото искуство и да создаде простор за заедничко учење и соработка.
За Општина Шуто Оризари, оваа посета претставува признание за нејзината улога како пример на ромско локално политичко лидерство, но и можност нашето искуство да биде споделено со ромски претставници од Европа.
Шуто Оризари покажува дека Ромите можат да учествуваат во носењето одлуки, да преземат одговорност за институциите и активно да ја креираат иднината на својата заедница.
Благодарност до Roma for Democracy, Roma Foundation for Europe, Roma Education Fund, ERIAC и REDI, како и до сите партнери на Sherutnipe, за препознавањето на значењето на Шуто Оризари и за оваа важна можност за европска размена.
Од Шуто Оризари испраќаме порака дека ромското политичко лидерство има сила тогаш кога се поврзува, соработува и создава конкретни резултати.
