Успешно одржана втората форумска сесија во Општина Шуто Оризари
Успешно одржана втората форумска сесија во Општина Шуто Оризари
По успешната прва средба каде што се мапираа клучните предизвици на заедницата, на 29.07.2026 во среда во Салата за состаноци на Општина Шуто Оризари се одржа и втората форумска сесија. Овој настан претставува директно продолжение на инклузивниот форумски процес во рамките на проектот „Зајакнување на општинските совети – Фаза 2“.
Процесот се реализира во партнерство со Министерството за локална самоуправа (МЛС), Швајцарската агенција за развој и соработка (SDC) и Програмата за развој на Обединетите нации (УНДП). Негова примарна цел е да им овозможи на граѓаните директно да учествуваат и да одлучуваат за приоритетите на локално ниво.
За време на оваа сесија, работните групи ги презентираа развиените проектни концепти кои беа дефинирани врз основа на предлозите и потребите на жителите нотирани на претходната средба. Презентираните концепти опфаќаат клучни области насочени кон долгорочно подобрување на квалитетот на животот во Шуто Оризари.
Сесијата помина во конструктивна атмосфера каде присутните граѓани, членовите на Советот на Општината, општинската администрација и граѓанските организации развија плодна дебата. Учесниците дискутираа за секој понуден концепт, давајќи свои сугестии и коментари со цел дополнително усовршување на предлозите.
Во наредната фаза, работните групи ќе ги финализираат проектните апликации врз основа на добиените насоки од вчерашната дебата. На следните форумски сесии, граѓаните на Шуто Оризари преку директно гласање самите ќе го изберат финалниот проект кој ќе биде целосно финансиран и реализиран со средства од проектниот фонд.
Форумите во заедницата претставуваат одлична алатка за зголемување на транспарентноста на општината и поттикнување на граѓанскиот активизам, придонесувајќи за инклузивен и рамномерен развој на Шуто Оризари каде секој глас се слуша.
